Erhard Bühler, dhëndër i Kosovës

Komandanti i KFOR-it, Erhard Bühler do të largohet këtyre ditëve nga Kosova pasi përfundon misionin. Megithëse kërkoi edhe një vit angazhim në vend për ta përfunduar punën e nisur të ndërmjetësimit për situatën në veri, shefat e tij në NATO nuk i’a vazhduan kontratën.

Pavarësisht faktit se KFOR-i mban qëndrim neutral ndaj statusit të Kosovës, serbët në Kosovë dhe Serbi e akuzuan atë se “po ua mban anën shqiptarëve për zhvillimet e fundit në veri të vendit”. Atë e quajnë pro shqiptarë, por kështu nuk mendon vet Buhler që tha disa herë “se po e bën punën për paqen dhe sigurinë e njerëzve”.

Megjithatë gjermani është i lidhur emocionalisht me shqiptarët. Klan Kosova raportoi se ai nuk do të largohet i vetëm nga Kosova por me një nuse Shqiptare, me të cilën u njoftua në Prizren gjatë vitit 2004 kur shërbente në trupat Gjermane.