Lufta kundër duhanit i detyron fabrikat të prodhojnë “cigare të padëmshme”

Besoj se të gjithë që pini cigare dhe jo vetëm, jeni ndeshur me mesazhin, kryesisht të shkruar mbi paketë: “Cigarja dëmton rëndë jetën”. Tashmë një lajm i mirë vjen për të gjithë duhanpirësit. Do të qarkullojë “cigarja e padëmshme”, e cila jo vetëm që nuk do të dëmtojë shëndetin tuaj, por do të ndihmojë që ta prisni duhanin.
Edhe pse nuk janë dhënë ende shumë detaje, organizatat kundër duhanit në Britani janë ngritur në këmbë dhe kanë vënë veto, duke mbështetur faktin se asnjë fabrike duhani nuk do t’i interesonte që të prodhonte një produkt që do të konkurronte produktin bazë të saj.

Në vitin 1578, Ser Walter Relate solli për herë të parë në Europë disa cigare nga SHBA. Por atëherë askush nuk mund ta besonte varësinë që ky produkt mund të shkaktonte tek njerëzit, por edhe kënaqësinë, paralelisht, por që në të ardhmen, do të ishte përgjegjës për vdekjen e 5 milion njerëzve në vit. Numër tragjik ky, që ia ka kaluar humbjeve të njerëzve gjatë luftërave, aksidenteve rrugorë dhe AIDS.

Sot, rreth një gjysmë-mijëvjeçari më vonë, qeveritë në të gjithë botën i kanë shpallur luftë cigares. Kështu, manifaktura të njohura duhani gjatë 50 viteve të fundit, po përpiqen të zbulojnë “cigaren e sigurt” që nuk do të shkaktojë as kancer, as plakje të lëkurës e as sëmundje të tjera të rrezikshme.

Sipas informacioneve nga qarqe shkencëtarësh, “British American Tobacco” (BAT) do të nxjerrë në shitje “cigaren e sigurt” rreth një vit më vonë. Madje ka kërkuar edhe vulën e Ministrisë britanike të Shëndetësisë.

Kjo do të thotë që kanë filluar eksperimentet rreth nikotinës në këto cigare të reja. Kështu, qëllimi është që cigaret të të japin të njëjtën ndjesi, të njëjtën kënaqësi, të kenë të njëjtën shije, por të jenë të padëmshme.