Një iluzion 3-D në qendër të Parisit! (foto)

Një sferë e gjelbër 3-dimensionale u shfaq para Bashkisë së Parisit, duke shkaktuar habi tek kalimtarët. “Kur e sheh nga larg, ngjason me një sferë që qëndron mbi tokë, ndërsa kur afrohesh, e kupton që në realitet bëhet fjalë për një nivel toke të gjelbëruar ku mund të ecësh, të shtrihesh, të shëtitësh me biçikletë…”. Këto ishin fjalët e artistit francez Francois Abelanet, i cili përshkruan iluzionin e gjelbër 3-dimensional që krijoi në qendër të Parisit, “duke vjedhur” kështu zemrat e parisianëve. Qëllimi i artistit ishte që t’i shkëpuste banorët nga e përditshmja dhe në vend të një lulishteje të zakonshme, krijoi këtë iluzion sferik, duke i bërë ata, por edhe turistët, të ndjejnë sikur ecin mbi sferën e ëndrrave të tyre dhe të shijojnë qëndrimin në hijen e pemëve të mbjella aty. 90 persona punuan me orar të zgjatur për 5 ditë për ta krijuar këtë “oaz” sferikl, ndërkohë që u nevojitën mbi 1.200 metër katror terren artificial, shumë pemë dhe 650 metër kub rëre që të përfundojë kjo sferë 3-D e gjelbër, që ka gjatësi 100 metra dhe mori emrin simbolik “Qui croire?” (që do të thotë “Çfarë të besosh?”).