Luvri, Muzeu më i vizItuar në Botë për 5 vite radhazi

Muzeu i Luvrit në Paris ishte më i vizituari në botë gjatë vitit 2011, ndërsa të dhënat e të përditshmes Art Newspaper treguan se 8,9 milionë persona vizituan muzen e famshëm me një rritje totale prej 5% në krahasim me një vit më parë. Luvri (Louvre) ka kryesuar listën vjetore të muzeve më të vizituar në botë që prej 2007. Kryedaktori i Art Newspaper, Javier Pes, tha se ky institut arti është kaq popullor edhe sepse në të gjendet piktura e famshme e Leonardo da Vinci, Mona Lisa, ndërmjet thesareve të tjerë të artit.
Pas tij renditej Muzeu Metropolitian i New York dhe bashkë me Muzeu Britanik plotësohet treshja e muzeve më të vizituar. Dy muze të tjerë londinezë, Galeria Kombëtare dhe “Tate Modern” renditeshin në vendin e katërt dhe të pestë, përkatësisht.

Në renditjen e publikuar, befasonte fakti që muzeu i Vatikanit në Romë, nuk përfshihej në dhjetëshe, ku përveç muzeve të lartpërmendur, figuronte edhe Galeria Kombëtare e Uashingtonit, Muzeu i Pallatit Kombëtar në Tajvan, Qëndra Pompidu në Paris, Muzeu Kombëtar i Koresë dhe Muzeu i Orsej në Francë.

Vizitat në muze kanë regjistrua rritje të re në 2011, pavarësisht se numri i turistëve, frekuentuesit kryesorë të muzeve, ka shënuar ulje. Pes tha se “në 2011-n, ishin muzetë amerikanë ata që vuajtën më shumë krizën ekonomike, me buxhetet e tyre që u reduktuan ndjeshëm, duke i detyruar që të anullonin disa aktivitete. Megjithatë, për muzetë e mëdhenj, kriza nuk është e ndjeshme sepse koleksionet e tyre të mëdha vazhdojnë të tërheqin në mënyrë të vazhdueshme vizitorë. E vërteta është se muzetë, vazhdojnë të mbajnë çmime shumë të ulta për një biletë hyrëse, në krahasim me vlerat që kanë në brendësi”.