Kërkohet implementimi i marrëveshjes për Veriun

Mitrovicasit ndajnë mendime të ndryshme rreth marrëveshjes së arritur ndërmjet Qeverisë së Kosovës dhe KFOR-it për veriun. Derisa disa prej tyre marrëveshjen dhjetë pikëshe e konsiderojnë të favorshme për Kosovën, ka edhe të atillë që nuk besojnë shumë në zbatimin e saj në praktikë dhe thonë se me këtë marrëveshje veriu ka hyrë në temën e bisedimeve Prishtinë-Beograd, njofton Kosovapress.

Naser Avdiu, banor i veriut të Mitrovicës, ka thënë se nëse marrëveshja zbatohet në mënyrë të drejtë, do të jetë marrëveshje e qëndrueshme, në të kundërtën do të ketë probleme.

Ndërkaq, sociologu Hajrullah Mustafa, kërkon implementimin e marrëveshjes për veriun, në mënyrë që të shtrihet pushteti edhe në këtë pjesë të vendit.

Analisti Musa Mustafa shprehet skeptik rreth zbatimit të marrëveshjes, ndërsa shfaq drojën se tash çështja e veriut do të shtrohet si temë diskutimesh në dialogun Prishtinë-Beograd me ndërmjetësimin e BE-së.