U martua me të dënuarin me vdekje

Kjo histori dashurie është mjaft e veçantë dhe nuk ngjason me asnjë histori tjetër. Protagoniste është Ginger, vajza që u dashurua me një të burgosur, me të cilin arriti të martohej. Sigurisht që martesa e saj nuk ngjasonte aspak me ato që kishte ëndërruar! Nuk kishte fustan të bardhë apo shkëmbim unazash. Madje as puthje nuk kishte! Ginger u martua me të fejuarin e saj Patrick Bearup, ndërsa ata i ndante që xham mbrojtës. Pasi përfundoi ceremonia, dhëndri u kthye dhe u izolua në qelinë e tij të vogël, në burgun e sigurisë së lartë, në Arizona (SHBA).

Gjithsesi, nusja 31-vjeçare u shpreh se ishte më e lumtur se kurrë, pasi u martua me princin e ëndrrave të saj.

Në vitin 2002, Patrick bashkë me dy shokë të tjerë goditën një burrë me shkopin e bejsbollit dhe pastaj, pasi e hodhën në një gropë, e qëlluan dy herë me armë zjarri, për t’u siguruar që kishte vdekur.

Vajza e re kujton që kishte lexuar në gazetë për këtë vrasje. Madje deklaroi që më shumë ishte shokuar nga fakti që burri me të cilin u martua, i kishte prerë viktimës gishtin në copa të vogla për t’i nxjerrë unazën.

Patrick u arrestua në shtator të vitit 2003 dhe u akuzua për vrasje të shkallës së parë.

E çuditshmja është që lidhja e kësaj vajze me vrasësin filloi kur ai ishte pas hekurave të burgut. Ajo shpjegoi se disa miq të përbashkët i sugjeruan të njihej me Patrick ndërkohë që ai po priste vendimin e gjykatës. Madje ata këmbëngulnin që ajo të pranonte. “Nuk mund ta besoja që miqtë e mi donin që t’i hapja zemrën një vrasësi. Nuk mund të kem lidhje me dikë që ndodhet në burg. Pastaj, një ditë mësova se Patrick u kthye në shtëpi dhe atëherë miqtë më bindën që t’i telefonoja”, thotë Ginger.

Ngjarjet rrodhën shpejt dhe ajo u lidh dhe u dashurua me Patrick. “Për të tjerët ai ishte një mostër, ndërsa për mua ishte Kazanova im”, thotë ajo.

Historia e tyre vazhdoi duke i dërguar njëri – tjetrit letra, komunikonin nëpërmjet telefonit dhe ajo e vizitonte në burg. Por, kur mësoi që njeriu që ajo dashuronte aq shumë do të dënohej me vdekje, u shkatërrua krejt. Atëherë ai i bëri propozim martese duke i thënë: “Dua të jemi bashkë deri në fund të jetës sime”.

Kështu u bë dhe çifti u martua. Dënimi me vdekje i Patrick nuk është ekzekutuar ende dhe bashkëshortja e tij përpiqet me çdo mënyrë për ta kthyer vendimin e gjykatës. Por deri më sot nuk ka arritur gjë.